OMEren arabera, eskuak dira “mikroorganismoak leku batetik beste batera mugitzeko biderik ohikoena”. Horrenbestez, eskuak garbitzea da “elikagaiak seguru edukitzeko” premisa garrantzitsuenetako bat.
Noiz garbitu eskuak:
- Jakiak prestatu aurretik.
- Jakiak prestatzen ari diren bitartean, haragi gordina, oilaskoa edo arraina manipulatu bada.
- Jakiz aldatzen denean. Adibidez, entsalada prestatzetik jada egositako jakietara igarotzen denean.
- Komunera joan ondoren, pixa oihala aldatu ondoren, eztul egin ondoren edo zabor poltsa hustu ondoren.
- Dirua manipulatu edo erre ondoren.
Nola garbitu eskuak:
- Kendu eraztunak, bitxiak edo erlojuak.
- Busti eskuak ur epelez.
- Eman xaboi likidoa.
- Igurtzi eskuak 20 bat segundotan.
- Garbitu arretaz esku ahurren atzeko partea, alboak, eskumuturrak, atzamar artean eta azkazalen azpiko aldea.
- Eskuak urez pasatu garbi egon arte.
- Lehortu eskuak behin erabiltzeko den toalla garbi batekin. Lehorketa ere funtsezkoa da eskuen garbiketa erabat eraginkorra izan dadin. “Egiteko prest dagoen janariaren kutsadura mikrobiologikoarekin lotura duten arriskuen ebaluazioa. Langileak eta arrisku horiek ahalik eta gehien murrizteko esku hartzeen eraginkortasuna” izeneko azterlanaren arabera, eskuak aire beroz lehortzeak “bakterioen maila %500era arte handitzen dute, eta, beraz, eraginkortasunik txikieneko sistema da lehortzeko”. Kontuan hartu behar da, gainera, ez dela gomendatzen gaixorik egonda jana prestatzea, elikagaiak erraz kutsatu baitaitezke. Garrantzitsua da, halaber, eskuak egon daitezkeen ebakiak tiritekin babestea, alde horietan bakterioak sortu ohi dira eta.
Higienearen garrantzia
Sukaldean, higienea funtsezkoa da elikagaien segurtasunerako.
Higienea, eskuetan ez ezik, sukaldean ere funtsezkoa da elikagaien segurtasunerako. Gune askotan bizi, hazi eta ugaldu daitezke bakterioak. Higienea bermatzeko eta elikagaiek eragindako intoxikazioak prebenitzeko, garrantzitsua da jakiak manipulatzeko erabiltzen diren tresna eta ekipo guztiak garbitzea eta lehortzea. Kontuan hartu behar da intoxikazioak eragiten dituzten bakterioak azkar hazi eta ugaldu daitezkeela, denbora, tenperatura edo hezetasunaren aldetik baldintza egokietan baldin badaude.
Beraz, sukaldea garbitzea funtsezkoa da jakiak seguru mantentzeko eta bakterioak zabaltzea ekiditeko. Gomendioetako bat da guneak eta tresnak erabili ahala garbitzen joatea. Horrek ekiditen du zikinkeria pilatzea, eta higiene baldintza hobeak edukitzen laguntzen du. Gaineko sukaldeen kasuan, jakiak prestatzen hasi aurretik garbitu behar dira, aurretik zukurik isuri bada edo haragi gordina edo arrautza gordinak manipulatu badira. Arreta bereziaz garbitu beharreko beste gune batzuk dira jakiak mozteko oholak, armairuak eta hozkailuko atea.
Iturria: Eroski-Consumer
